Guía de nomes galegos

Do sobrenome latino, e despois nome, da época imperial Maximilianus, resultado da unión doutros sobrenomes ou alcumes romanos: Maximus e Aemilianus (Máximo e Emiliano). Tamén se ten interpretado como o xentilicio de Maximus mediante a disimilación dun Maximinianus.

San Maximiliano de Lorch (século III) foi o fundador do bispado desta cidade do Danubio. Morreu martirizado por negarse a facer sacrificios aos deuses pagáns. Este santo bávaro-austríaco fíxose moi popular nos séculos XVI e XVII por levaren o seu nome dous emperadores da Casa de Austria e varios electores de Baviera, entre eles Maximiliano I, emperador do Sacro Imperio Xermánico de 1508 a 1519, avó de Carlos V, que foi quen o sucedeu. Outro santo, xa do século XX, foi Maksymilian Maria Kolbe, franciscano polaco que morreu no campo de exterminio de Auschwitz en 1941.

Dous personaxes históricos: Maximilien de Robespierre (1758-1794), xefe da ala máis radical dos xacobinos da Revolución francesa; e Ferdinand Maximilian de Habsburgo-Lorena (1832-1867), coñecido como ‘Maximiliano de Austria ou de México’, que, co apoio de Francia e Gran Bretaña, intentou facerse emperador de México, pero foi fusilado en 1867 polas tropas do presidente Benito Juárez. O pintor francés Édouard Manet contribuíu a darlle sona ao suceso e ao nome cunhas pinturas de gran formato que realizou entre 1867 e 1869 baixo o título A execución do emperador Maximiliano.

En Galicia: Maximiliano Linares Rivas, avogado e político (f. 1932), e Maximiliano Asúnsolo Linares-Rivas, neto do anterior (1896-1931).