Guía de nomes galegos

Do nome xermánico Mahthildis, composto de *maht 'forza' e *hildi 'combate'. Deste nome derivou no occidente da Península Ibérica o nome Mafalda.

Houbo polo menos dúas raíñas santas con este nome: santa Matilde (890-968), raíña de Xermania polo seu matrimonio con Henrique o Paxareiro; tiveron cinco fillos, entre eles Odón o Grande, futuro emperador do Sacro Imperio. Santa Matilde de Inglaterra (1080-1118), filla de santa Margarida de Escocia e raíña de Inglaterra polo seu casamento con Henrique I.

Por se lle atribuír a autoría do famoso Tapiz de Bayeux (Normandía) —marabillosa obra que narra en viñetas a conquista de Inglaterra do ano 1066— tamén é coñecida Matilde ou Mahaut de Flandres, esposa de Guillerme, duque de Normandía e conquistador de Inglaterra.

No século XX o nome popularizouse pola canción "Mathilde” de Jacques Brel (1966), adaptada ao inglés en 1967 por Scott Walker, Ademais, en 1988 Roald Dahl publicou a novela Matilda, levada ao cinema en 1996. “Waltzing Matilda” é, ademais a canción folclórica máis coñecida de Australia (especialmente no ámbito internacional), proposta como himno nacional.

Ruth Mathilda Anderson (1893-1983), fotógrafa estadounidense que entre 1923 e 1930 realizou en España, e en Galicia en particular, gran cantidade de fotografías de cidades, vilas, aldeas e persoas; as fotos galegas publicaríanse en 1939 en Nova York co título Gallegan provinces in Spain.