Guía de nomes galegos

Do nome hebreo Matithyah "don de Iavé" –do que tamén procede Mateu–, que pasou ao grego como Maththías e ao latín como Mat(t)hias.

San Matías foi o apóstolo que substituíu a Xudas Iscariote tras o suicidio deste. Non o chamou Cristo, senón que o elixiron por sorteo entre os do colexio apostólico. Evanxelizou Xudea e morreu lapidado diante do templo de Xerusalén.

Macías o Namorado, padronés do século XIV, foi un dos derradeiros trobadores galegos medievais e ao mesmo tempo heroe literario. A lenda fixo del un prototipo de servidor do amor cortés. Morreu na prisión atravesado pola lanza dun marido celoso. O seu final seméllase ao do Romeo de Shakespeare ou ao do Werther de Goethe.