Guía de nomes galegos

A palabra aramea La'zar 'Deus veu axudar' é unha das palabras que se conservan sen traducir no orixinal do Novo Testamento (Lc 16,20-25), como testemuño da lingua familiar que Xesús falaba, incluso en contextos relixiosos nos que a diglosia impoñía o uso do hebreo. A forma hebrea sería Eleazar. A forma aramea chegou a nós a través do grego Lázaros e do latín Lazarus.

Hai dous Lázaros nos Evanxeos. Un deles é o pobre da parábola de Cristo, que se poñía na porta do rico Epulón para matar a fame coas faragullas que caían da mesa deste. O outro é Lázaro de Betania, irmán de Marta e María, amigo de Xesús, a quen resucitou despois de tres días de morto e enterrado.

Aínda houbo outros dous santos máis con este nome: un bispo de Milán (século V) e outro monxe e pintor de iconas en Constantinopla (século IX), martirizado polo emperador de Oriente iconoclasta Teófilo.