Guía de nomes galegos

Do adxectivo leda ‘contenta, feliz’, do latín laeta, co mesmo significado. Foi unha voz moi empregada nas nosas cantigas de amigo medievais: “leda dos amores, dos amores leda” (Pero Meogo), “tódalas aves do mundo d’amor dizian: | leda m’and’eu” (Nuno Fernández Torneol), “mui leda irei, amigo, | e vós ledo comigo” (Martín de Padrocelos). É homónimo do nome mitolóxico grego Leda.

Na mitoloxía grega, Leda era filla de Testio, rei da Etolia, e foi nai de Clitemnestra, de Helena (a de Troia) e de Castor e Pólux, os Dióscuros, estes últimos fillos tamén de Zeus.