Guía de nomes galegos

Deriva do nome latino Innocentius, derivado de innocens 'que é inocente', 'que non fai dano', de in-, con sentido negativo, e nocere 'facer dano'.

Houbo trece papas con este nome, entre os que salientamos os seguintes: Inocencio III (1198-1216), que intentou instaurar unha teocracia para facer valer o poder da Igrexa fronte aos emperadores; impulsou a cuarta cruzada e tamén combateu a chamada herexía albixense que dexenerou nunha operación de castigo militar contra toda a Occitania; Inocencio VIII (1484-1492), que multiplicou a venda de oficios; Inocencio X (1644-1655), famoso polo retrato que del fixo Velázquez; Inocencio XI (1676-1689), beato, loitou contra o nepotismo; Inocencio XIII (1691-1700), que condenou o xansenismo.

Santa Inocencia de Rimini (século IV), virxe e mártir no tempo de Diocleciano. Outra santa Inocencia, de Ravenna (século V) foi filla de san Severo, bispo desta cidade italiana.