Guía de nomes galegos

É un de tantos nomes como Froitoso, Máximo, Fidel ou Breixo, que orixinariamente foron adxectivos: este vén do latín inmaculata, de in-, con sentido negativo e macula 'mancha', 'falta'. O catolicismo aplicouno a María, co significado de 'sen mancha', 'sen pecado'.

A festa da Inmaculada Concepción xa se documenta no século VIII en ambientes bizantinos. Na catedral de Santiago documéntase en 1262, pero ignoramos cal era aquí o seu significado, pois tamén se aplicaba a santa Ana, pola concepción de María. A finais da Idade Media algúns quixeron modificar o contido da festa aludindo a que María, desde a súa concepción, estivo ausente da mancha do pecado orixinal. Sisto IV aprobou a festa en 1476. Pío Nono definiuna como dogma en 1854, pero a idea xa estaba asentada na España do século XVII, como se pode apreciar nas obras artísticas de escultores como Gregorio Fernández e Mateu de Prado, galegos, ou de pintores como Murillo e Velázquez.