Guía de nomes galegos

Nome de orixe xermánica e introdución recente, por vía francesa, posiblemente a partir dun elemento franco, *hug 'intelixencia', 'bo senso'.

Entre os santos, destacan santo Hugo de Cluny (1024-1109), iniciador da gran basílica de Cluny (1080), da que foi abade, e organizador da peregrinación a Compostela. Santo Hugo de Grenoble (1053-1132) foi o bispo desta cidade francesa que lle cedeu a san Bruno un extenso territorio para o mosteiro da Gran Cartuxa. Santo Hugo de Lincoln (1140-1200), francés de nacemento, sería chamado por Henrique II de Inglaterra para a cartuxa de Withman; consagrado bispo de Lincoln, mandou construír a catedral desta cidade.

O cóengo Hugo, de orixe francesa, foi un dos redactores da Historia Compostelá no episcopado de Xelmírez. Ocupouse de relatar o que precisamente el mesmo denominou “o pío latrocinio”, do que foi cómplice principal: o roubo e traslado en 1102 das reliquias dos santos Froitoso, Covade, Silvestre e Susana de Braga para a diocese de Santiago. Hugo sería despois promovido polo arcebispo compostelán a bispo do Porto, que na altura era do reino de Galicia.

Hugo foi un nome de estirpe dos duques da Borgoña, que o mantiveron na súa dinastía durante varias xeracións ao longo de máis de dous séculos: desde Hugo I (1076-1079) a Hugo V (1306-1315).

Hugo Grocio (1583-1645) foi un famoso xurista e escritor holandés.

Hugo Pratt (1927-1995), debuxante de banda deseñada italiano, creador do aventureiro Corto Maltés.