Guía de nomes galegos

Do latín Hortensius, e este derivado de hortus 'lugar circundado por unha sebe ou delimitado dalgunha maneira' e posteriormente 'xardín', 'horta'. O significado, polo tanto, debe de ser 'xardineiro, xardineira'.

Hortensia foi nome dunha gens romana, que tivo o seu epónimo en Quintus Hortensius Hortalus (114 - 50 a. C.), célebre orador que tamén tivo unha filla chamada Hortensia, ben dotada para a declamación.

Do mesmo xeito que outros nomes tomados de flores (como Dalia, Narciso, Violeta ou Xacinto), entre nós a forma feminina debeuse popularizar polo nome da planta ornamental Hydrangea hortensia, denominada así en honor de Hortense Lapaute, astrónoma francesa do século XVIII.

A ferrolá Hortensia Landeira Pontijas (1912-1999), pintora e escritora, activista política contra a ditadura franquista; cando finou, Xohana Torres dedicoulle un fermoso poema.

Hortensia Blanch Pita (1914-2004), escritora de orixe galega coñecida como Silvia Mistral.