Guía de nomes galegos

Do nome latino Caecilia, que se considera un derivado do adxectivo tamén latino caecus 'cego'.

Santa Icía de Roma (século III) é, xunto a santa Inés, a máis popular das mártires romanas. O seu culto é antigo en Hispania (século X). Era unha rapaciña patricia romana forzada a casar cun tal Valeriano, casamento que ela rexeitaba. A finais do século XV convertérona en patroa da música debido a unha mala tradución dunha frase escrita en latín referida a súa historia, pois co extracto in suo corde ‘no seu corazón’ entendeuse que Icía ía cantando no día do seu casamento “ao son dos instrumentos musicais”, cando era todo o contrario, pois ía apesarada e triste. Con todo, o seu padroado musical viuse impulsado en época renacentista para evitar que se tentase recuperar a musa pagá Euterpe.

Cecilia Böhl de Faber (1796-1877) era o nome verdadeiro da escritora española que asinaba como Fernán Caballero.

Cecilia foi o nome artístico da cantante madrileña Evangelina Sobredo (1948-1976), filla de galegos.

Na forma masculina levouno Cecil Rhodes (1853-1902), político colonialista británico en África do Sur, e Cecil B. DeMille (1881-1959) famoso realizador estadounidense de cinema.

Foi o segundo nome do profesor Manuel Cecilio Díaz y Díaz (1924-2008), latinista e medievalista.