Na mitoloxía grega, Ifixenia é unha das fillas de Agamenón, rei de Argos e de Micenas. O monarca enfurecera a deusa Artemisa e por esta causa a frota helena disposta para marchar cara a Troia estaba paralizada por unha calma persistente. Un adiviño dixo que só o sacrificio de Ifixenia podería aplacar a cólera da divindade. Cando a ían inmolar no altar, a deusa tivo compaixón da moza e puxo unha cerva no seu sitio para o sacrificio. O caso é moi semellante ao bíblico de Isaac.
Eurípides escribiu dúas traxedias sobre Ifixenia, que tamén inspirou a Racine e a Goethe.
No cristianismo houbo unha santa e unha beata con este nome: unha virxe de Etiopía, de dubidosa base histórica, e Ifixenia de St.-Mathieu, monxa francesa guillotinada en 1794 por revolucionarios franceses.
