Guía de nomes galegos

Nome grego, Philḗmōn, derivado de phileîn 'amar'; polo tanto 'afectuoso, amable'.

Na mitoloxía grega Filemón e Baucis eran unha parella de vellos namorados que deron pousada a Zeus e a Hermes. O tema inspirou o poeta latino Ovidio (Metamorfoses).

Xa no Novo Testamento, Filemón é un cristián acomodado, destinatario da Epístola a Filemón, de san Paulo. A carta levoulla Onésimo, un escravo que lle fuxira a Filemón e que Paulo atopou en Roma; converteuno ao cristianismo e devolveuno ao seu amo cunha breve misiva na cal lle pedía que o tratase coma un irmán. Esta epístola está na liña doutros documentos pagáns da época en que se pedía máis humanidade cos escravos, pero non se cuestionaba o feito da escravitude.