Á familia Cornelia romana pertencían os Escipións, políticos e militares da época da república: Publio Cornelio Escipión o Africano (235-183 a. C.) venceu a Haníbal en Zama (202 a. C.) e Publio Cornelio Escipión Emiliano (185-129 a. C.) destruíu Numancia en Hispania.
Cornelia (c. 189-c. 110 a. C.) era filla de Escipión o Africano e nai dos Gracos, dirixentes do partido da plebe romana. Outra Cornelia (97 a. C. - 68 a. C.) foi a primeira esposa de Xulio César.
San Cornelio foi o único papa con este nome (251-253). Hai outro san Cornelio na Bretaña francesa; segundo unha lenda bretoa, as longas ringleiras de menhires dos famosos aliñamentos de Karnag son soldados romanos petrificados polo santo.
