Guía de nomes galegos

Do latín eclesiástico Cosmas, desde o grego Kosmâs, derivado de kósmos 'orde'. A variante Cosmade é antiga e de difícil explicación etimolóxica.

San Cosmede e san Damián (séculos III-IV) foron dous mártires sirios, médicos de profesión, que sandaban desinteresadamente e facían curacións milagrosas. Son dos santos máis antigos do culto hispánico (século VII). Convertidos en patróns dos médicos, tense dito que o culto a estes santos xemelgos cumpriu a misión de cristianizar o culto pagán anterior dos dióscuros grecolatinos, Castor e Pólux (véxase Castor).

Cosimo de Medici (1389-1464), político e banqueiro de Florencia, fundador da dinastía dos Medici e mecenas de artistas. Un dos seus descendentes, Cosimo III de Medici, visitou Galicia en 1669; no seu séquito ía o pintor Pier Maria Baldi, que debuxou vistas panorámicas das cidades e vilas polas que pasaba: Tui, Redondela, Pontevedra, Padrón, Santiago, A Coruña etc.