Guía de nomes galegos

Do topónimo asturiano Covadonga, á súa vez procedente quizais do latín *cova dominica 'cova do señor'.

O santuario da Virxe de Covadonga (Asturias) ergueuse preto de Cangas de Onís, no lugar onde supostamente tivo lugar a batalla de Covadonga entre o 718 e o 722. Segundo a lenda, neste sitio, un desfiladeiro entre as montañas, un caudillo local chamado Pelagius (‘Paio’) derrotou coa axuda milagrosa da Virxe un exército musulmán invasor desprazado desde Al-Ándalus. Algúns autores consideraron esta acción bélica como o inicio da que se deu en chamar Reconquista, dando por sentado que o tal Paio intentaba restaurar o reino visigodo perdido na batalla do río Guadalete (711).

Esta visión hoxe está totalmente cuestionada, en primeiro lugar porque esa batalla non está documentada nin por cristiáns nin por musulmáns, e atribúese a súa invención aos cronistas da corte do rei ástur-galaico Afonso III por volta do ano 900, uns 200 anos despois. Coa pretensión de xustificaren a lexitimidade deste monarca, os cronistas rexios inventaron unha xenealoxía que o fai proceder dos visigodos. Iníciase así o que se deu en chamar “neogoticismo” da historiografía española: a suposta continuidade entre os reis godos e os ástur-galaicos.