Guía de nomes galegos

Nome mitolóxico, fillo de Leda e Zeus. Vén do grego Kástōr, e este quizais do hebreo onde significa 'almiscre'. Actualmente conviven en galego as formas Castor e Cástor; a primeira é a máis aceptada.

Na mitoloxía grega Castor e Pólux eran os Dióscuros (‘fillos de Zeus’), heroes xemelgos fillos de Leda e irmáns de Helena [de Troia] e de Clitemnestra. A versión máis difundida é que Zeus se metamorfoseara en cisne e seducira a Leda, e que os xemelgos saíron de dous ovos que esta puxo. Castor fíxose famoso como domador de cabalos e Pólux na loita corpo a corpo. Xuntos acompañaron a Xasón na expedición dos argonautas na procura do vélaro de ouro. Como parella de xemelgos inseparables recibiron culto en Roma, e a súa historia asociouse á de Rómulo e Remo e, xa no cristianismo, a santos irmáns e xemelgos como Cosmede e Damián.

San Castor de Karden evanxelizou a rexión alemá do río Mosela no século IV; é patrón da cidade de Coblenza

Castor Elices (1847-1886), médico militar e escritor de Celanova, mencionado por Curros Enríquez na obra O divino sainete.