Guía de nomes galegos

Do latín Cassianus, en principio adxectivo derivado de Cassius, apelido dunha familia romana patricia (posteriormente plebea). Despois foi cognome e finalmente, na época imperial, nome persoal.

San Casiano de Ímola (século IV), da Romaña italiana,  mestre de escola que foi martirizado polos seus discípulos, que acabaron por lle cravar os seus estiletes.

San Casiano de Marsella (360-432), natural de Atenas, foi eremita en Exipto e chegou finalmente a Marsella, onde fundou un mosteiro para homes (o de san Vítor) e outro para mulleres.

Casiano de Prado (1797-1866), natural de Santiago de Compostela, xeólogo e enxeñeiro de minas que formou parte da primeira xeración revolucionaria liberal galega do século XIX, que emparentaría coa de 1846. En 1817 foi detido pola Inquisición de Santiago acusado de ler libros prohibidos, e pasou 400 días recluído nun dos seus cárceres secretos. Andando o tempo sería inspector xeral de Minas e académico da Real Academia de Ciencias Exactas de Madrid.