Guía de nomes galegos

Nome da heroína troiana Kassándra ou Kasándra. O masculino Kássandros tamén está documentado, sobre todo como nome dun rei macedonio. Trátase dunha forma composta cun segundo elemento -andra, do sustantivo 'varón', 'home', pero non está claro cal é a etimoloxía do primeiro elemento. Tense relacionado coa raíz *ked- que forma o adxectivo kednós 'prudente', 'dilixente', 'valente'. Para outros podería relacionarse coa raíz *kad-, que atopamos no perfecto *ke-kad-mai > kékasmai 'sobresaír'.

Casandra, na mitoloxía grega, era filla de Príamo e de Hécuba, reis de Troia. Dela namorouse o deus Apolo, que lle regalou o don da profecía para conquistala, como adoitaba facer con todos os seus amoríos. Casandra acabou cansa de Apolo e, cando adquiriu a facultade da adiviñación, rexeitouno. O deus, cortesmente, non lle retirou o don pero retiroulle o da persuasión. Dende aquela Casandra profetizaba ao dereito, pero a xente entendíaa ao revés e non lle facía caso. Así foi que ninguén a escoitou cando vaticinou a caída de Troia mediante o engano do cabalo agasallado polos astutos gregos.