Guía de nomes galegos

Adaptación do nome irlandés Brigit ou Brighid, relacionado etimoloxicamente co elemento celta brig, presente en numerosos topónimos galegos (no medieval Brigantia e nos moitos rematados en -bre, como Bañobre, O Xobre, Sillobre etc.). Nomeaba unha antiga deusa, tamén chamada Briganti, protectora do lume, das artes e das ciencias.

O culto a santa Bríxida de Kildare (Irlanda), do século V, cristianizou o da antiga deusa céltica Brigantia, divindade da luz, do lume, da fertilidade, das artes e das ciencias. Foi bautizada por un discípulo de san Patricio e fundou o convento de Kildare, onde foi abadesa. O seu culto está moi espallado polos países celtas. Os irlandeses asimilárona á propia Virxe María.

Santa Bríxida de Suecia (1303-1373) foi unha muller nobre que tomou o nome da santa irlandesa. Casou con Ulf Gudmarson e xuntos peregrinaron a Compostela. Quedou viúva aos 40 anos con oito fillos e entrou nun convento do Císter.

Brígida Muñiz Suárez, labrega e política galega, nacida en Boiro. En 1936 foi elixida concelleira da corporación municipal por Izquierda Republicana. Tras o golpe de Estado militar sufriu todo tipo de vexacións e represalias.