Guía de nomes galegos

Do grego Eulalía 'elocuente, que fala ben' (eû 'ben' e laleîn 'falar'). En galego houbo diversas variantes deste nome que perviven nos títulos das parroquias e nos apelidos. As formas enxebres deron lugar a apelidos galegos como Santalla, Santabaia ou Santoalla. Numerosas parroquias que hoxe corren como Santa Eulalia figuran en documentación que chega ao século XV como Santa Alla ou Santa Balla.

Santa Baia (séculos III-IV) foi mártir en Mérida ou en Barcelona, pois as dúas cidades disputaron a súa procedencia; trátase da mesma persoa, pois coinciden na lenda, na idade e no tipo de martirio. En todo caso é a santa con culto máis antigo na Península Ibérica. En Galicia está bastante espallado, talvez pola antiga relación da Gallaecia con Emérita Augusta (Mérida), a capital da Lusitania.