Guía de nomes galegos

Do latín Aurelius, nome dunha gens romana, probablemente tirado da mesma voz indoeuropea da que procede Aurora. Outros falan dunha orixe no latín aurum 'ouro'.

O emperador Marco Aurelio, alcumado o Sabio, pasou á historia non só por ser un eminente filósofo estoico, senón tamén como xurista, home de moita cultura e con grandes dotes de estadista. Foi un emperador que gobernou con xustiza e equidade, do ano 161 ao 180.

Houbo un santo Aurelio de Cartago (séculos IV-V), que foi bispo desta cidade e amigo de santo Agostiño, e outro de Córdoba (século IX), mártir.

Aurelia era un nome habitual nas mulleres romanas; así se chamaba a nai de Xulio César (séc. I a. C.).

Santa Aurelia de Estrasburgo (século IV) era compañeira de santa Úrsula, pero non morreu coma esta e as once mil virxes en Colonia, debido a que antes enfermara na cidade alsaciana.

Aurelio Aguirre (1833-1858) e Aurelio Ribalta (1864-1940), escritores galegos.