Guía de nomes galegos

Na Idade Media era un nome persoal variante de Arias, pero actualmente tamén pode ter motivación toponímica, posto que é nome dun concello da provincia da Coruña e dun lugar nas Pontes de García Rodríguez, amais de varios lugares Os Ares (que seguramente conteñan o nome persoal), e doutros que o levan en segundo lugar (Castro de Ares, Casaldares). O nome do concello, que tamén o é da ría, ten orixe prelatina e foi rexistrado polos romanos como Anaris; contén o elemento hidronímico ana ‘río’.

O fidalgo Ares Pérez das Mariñas, señor das torres de Cillobre, mantivo a principios do século XV continuas e violentas loitas cos abades do mosteiro de Soandres, na comarca de Bergantiños, pola posesión das terras. Foi denunciado repetidamente polos frades deste mosteiro perante o rei.