Guía de nomes galegos

Nome de orixe xermánica, frecuente na documentación medieval galega desde o século IX. Composto polas raíces góticas alls ‘todo’ e wars ‘coidado, precaución’. Este nome deu lugar ao apelido Álvarez.

Nome moi popular nos reinos cristiáns peninsulares da Idade Media, sobre todo entre as familias nobres. Álvar Páez de Soutomaior e Álvar Pérez de Moscoso (ambos do século XV), foron dous deles. Santo Álvaro García (século XIII) foi mártir no Algarve.

O navegante galego Álvaro de Mendaña e Neira (c. 1542-1595), descubridor no océano Pacífico dos arquipélagos das Salomón (1568) —coñecido como “o descubrimento dos catro galegos”— e das Marquesas (1595); próximo á morte pola peste, nomeou almiranta da frota a súa esposa Isabel Barreto —a primeira muller da historia neste cargo— que continuou coa expedición.

O debuxante e caricaturista coruñés Álvaro Cebreiro (1903-1956) e os escritores Álvaro de las Casas (1901-1950), fundador dos Ultreias —primeiros grupos xuvenís galeguistas— e Álvaro Cunqueiro Mora (1911-1981), que tamén foi xornalista (dedicóuselle o Día das Letras Galegas de 1991).