Guía de nomes galegos

En latín, o adxectivo almus significa 'benéfico, que nutre, que dá a vida', e era usado por varias divindades, entre elas, Ceres, definida como alma mater, isto é, 'nai que alimenta os fillos'. Na súa difusión nas linguas romances seguramente influíu a coincidencia coa voz común alma, do latín anima 'alento, sopro'.

O seu uso como nome feminino comezou no Reino Unido, despois da Batalla de Almá (1854), nomeada así polo río de Crimea onde tivo lugar, e que non ten que ver coa etimoloxíalatina. Tivo tamén difusión en Alemaña e nos países veciños.

A vienesa Alma Mahler (1879-1964), relacionada con grandes artistas da súa época (o compositor Gustav Mahler, o pintor Oskar Kokoscha, o arquitecto Walter Gropius e o escritor Frank Werfel). A súa produción artística foi sobre todo como compositora.