Guía de nomes galegos

Este nome ten a mesma orixe e significado que o xermánico Adelaida, do que procede a través do antigo nome francés Aalis. Tivo difusión na Baixa Media francesa por ser nome de personaxes literarios, sobre todo da nobreza. Documéntase nas nosas Cantigas de santa María (séc. XIII) como Alís. As formas francesas antigas Aalis ou Aalais latinizáronse como Alicia e Alesia, que pasaron a Inglaterra baixo a forma Alice.

Despois de caer en desuso, púxoo de moda a obra de Lewis Carroll Alicia no país das marabillas (1865) e da súa continuación Alicia do outro lado do espello (1871).

Alicia de Larrocha i de la Calle (Barcelona, 1923-2009), pianista e compositora.

Alicia Crespí González (Pontevedra, 1922 - Madrid, 2012), científica e primeira catedrática dunha escola superior en España, en concreto catedrática de electrotecnia, luminotecnia e técnicas de acondicionamento e acústica.