Guía de nomes galegos

Nos textos medievais galegos atéstanse os nomes Alifredus e Alifreda, de orixe xermánica, formados polas raíces góticas alj, talvez de aljis ‘outro’, co sentido ‘estranxeiro’ e mais *frith ‘paz'. Máis tarde incorporouse o nome anglosaxón Aelfraed, de aelf, ‘elfo’ e raed, ‘consello’ e os dous resultados acabaron confluíndo.

Recibiron este nome moitos homes importantes da historia de Inglaterra, como o rei anglosaxón Alfredo o Grande (849-901), fundador da Universidade de Oxford ou santo Alfredo, bispo de Hildesheim (século IX).  

A difusión do nome en Europa prodúcese a partir da súa introdución en Francia no século XVII.

Alfredo foi o amante de Violetta, protagonista da ópera La traviata (1853) de G. Verdi.

O profesor e escritor Alfredo Brañas (1859-1900), natural de Carballo, foi o máximo representante do rexionalismo conservador da segunda metade do século XIX. Alfredo Fernández ‘Nan de Allariz’ (1875-1927), escritor, e Alfredo García Alén (1923-1981), historiador.

O científico sueco Alfred Nobel (1833-1896) e o cineasta inglés Alfred Hitchcock (1899-1980) foron algúns dos persoeiros famosos con este nome. Entre 1894 e 1906 tivo repercusión mundial o caso do militar francés de orixe xudía Alfred Dreyfus, inxustamente acusado e condenado por espía.