San Zenobio de Florencia (337-417) foi o primeiro bispo desta cidade; tivo sona de taumaturgo e exorcista. O pintor Sandro Botticelli realizou entre 1495 e 1500 catro táboas pictóricas de milagres e episodios da súa vida.
Zenobia de Palmira foi raíña do imperio de Palmira de 267 a 272, período en que tomou o poder tras o asasinato do seu esposo. Vencida polo emperador Aureliano e levada a Roma como refén, dise que este lle permitiu levar unha vida digna nunha vila en Tibur (Tívoli), onde se converteu nunha destacada filósofa.
Na Igrexa oriental son venerados os santos Zenobio, médico e bispo de Exea en Cilicia, e a súa irmá Zenobia, ambos martirizados na persecución de Diocleciano.
