De orixe semítica, transmitíusenos coa forma latina Zacchaeus e a grega Zakchaios, correspondente ao nome persoal hebreo Zakkai que aparece no Antigo Testamento e mais nos Evanxeos. Interpretouse como 'puro' (zak 'puro'), e polo tanto relacionado coa raíz verbal zkh 'ser puro'. Non obstante, parece máis probable que isto sexa unha etimoloxía popular e que o hebreo Zakkai sexa unha forma hipocorística do nome Zekharyâh que deu lugar a Zacarías e que significa 'Deus lembrouse'.
