Guía de nomes galegos

Do grego Zḗnōn, forma abreviada de diversos nomes, como Zēnódotos 'dado por Zeus' e Zēnódōros 'regalo de Zeus'. Zeus é na mitoloxía grega o Iuppiter da latina, o deus da luz e do día, o xefe dos deuses.

Houbo varios filósofos na antigüidade helénica con este nome; o de máis sona foi Zenón de Elea (século V a. C.), coñecido polo seu argumento sobre a imposibilidade do movemento baseado no exemplo de Aquiles e a tartaruga.

San Zenón de Verona (século IV), africano de nacemento, foi bispo desta cidade italiana, á que segundo din salvou de grandes inundacións. É patrón de Verona, onde se ergueu na súa honra unha gran basílica, xoia do estilo románico (século XII).

O personaxe de máis sona con este nome foi Zenón de Somodevilla y Bengoechea, marqués de la Ensenada, conselleiro de estado nos reinados de Filipe V, Fernando VI e Carlos III, coñecido polo catastro que leva o seu nome —iniciado en 1750—, pero tamén pola chamada Gran Redada (1749), que pretendía o exterminio do pobo xitano.