Guía de nomes galegos

Xacob é un nome de moi antiga tradición no hebreo. A mesma Biblia tenta dar unha explicación do seu significado (Xén. 25,25 e 27,36). O étimo remoto é Ya'aqôbh, que no libro da Xénese é o nome do fillo de Isaac e Rebeca, nacido en parto duplo despois de Esaú. Neste caso na Biblia interprétase o nome como derivado de 'âquebh 'calcañar', porque ao nacer agarraba coa man o calcañar de seu irmán. Por etimoloxía popular, asociouse á raíz 'âqab 'suplantar, enganar', porque Xacob suplantou a Esaú na primoxenitura. Non obstante, o máis probable é que se trate dun nome teofórico que contén a raíz 'qb 'protexer', co significado de 'Deus protexeu'.

Na Biblia, Xacob foi un patriarca de Israel, fillo de Isaac e de Rebeca e xemelgo de Esaú. Comproulle ao seu irmán o dereito de primoxenitura por un prato de lentellas e recibiu mediante engano a beizón do seu pai, vello e cego. Marchou a Mesopotamia para fuxir da ira do seu irmán. Alí gardou o gando do seu parente Labán e casou coas súas fillas, primeiro con Lea, de quen tivo dez fillos, e despois con Rebeca, de quen tivo os dous últimos. Os seus doce fillos darían nome ás doce tribos de Israel.