Guía de nomes galegos

A variante Xacobe parte de Xacob cun -e paragóxico, como vogal de apoio ante unha consoante insólita en galego nesa posición final.

Xacobe foi un nome de estirpe da casa escocesa dos Estuardo (Stuart), que levaron seis reis de Escocia dos séculos XV e XVI: de Xacobe I (1406-1437) a Xacobe VI (1567-1625). Este último, fillo da raíña dos escoceses María Estuardo, herdaría tamén a coroa de Inglaterra á morte sen descendencia da súa tía Isabel I e reinaría conxuntamente as dúas nacións como Xacobe I de Gran Bretaña (1603-1625). Un neto seu, Xacobe II (1685-1688), sucedería ao seu irmán Carlos II no trono británico e intentaría que os seus súbditos volvesen ao catolicismo, pero atopouse coa oposición da maioría da poboación británica. Animado polo apoio dos católicos irlandeses, desembarcou en Irlanda para situar alí a base das operacións. O exército dos seus seguidores católicos —os xacobitas (the Jacobites)— sería derrotado polo protestante de Guillerme de Orange na batalla do Val de Boyne (1690), e Xacobe fuxiría a Francia. A vitoria protestante nesta batalla aínda é motivo de celebración nos nosos días pola Orde de Orange dos unionistas de Irlanda do Norte, con fastosos desfiles.

Jacobus a Voragine, máis coñecido como Jácopo della Vorágine, foi un frade dominico italiano nacido en 1228 en Varazze (Varagine en época medieval) e morto en Xénova en 1298, onde chegou a ser bispo. Os italianos tamén se refiren a el como Jacopo da Varagine ou da Varazze. A súa sona debeuse á recolleita que fixo das vidas de moitos santos e santas —a Legenda Aurea (Lenda Dourada)—, a maior parte fabulosas, escritas en latín a partir de 1260 e reelaboradas á súa morte. Esta obra tivo moita difusión por toda Europa, influíu na literatura relixiosa e foi fonte iconográfica para moitos artistas. O papa Pío VII declarouno beato e ten unha capela na súa honra en Varazze (Savona-Liguria).

Jacoba Cisneros (1813-1860), aristócrata galega, mecenas das artes e das letras.

Jacoba Gil Taboada, empresaria galega da minería de finais do XVIII e principios do XIX.