Guía de nomes galegos

A orixe remota deste nome está no nome do patriarca bíblico Xacob. A súa evolución parte do nome dos dous apóstolos, que, a partir da versión latina do Novo Testamento deu a variante Jacomus, de onde proceden directamente Xácome (forma que entre nós sempre perviviu como apelido) e Xaime. Esta última é adaptación da forma occitana e catalá Jacme ou Jaume. A antigüidade deste nome en Galicia está testemuñada pola súa aparición nas Cantigas de Santa María, do rei Afonso X o Sabio, onde se rexistran as formas James  e Jaymes, que tamén se ven na Crónica Troiana, no século XIV, como adaptación galega do nome do rei de Aragón, Jaume el Conqueridor.

Na historia medieval da península ibérica foi famoso Xaime I de Aragón o Conquistador (1208-1276), rei de Aragón (1213-1276), de Valencia (1238-1276), de Mallorca (1229-1276), conde de Barcelona (1213-1276) e señor de varios feudos na Occitania.

Jacques Cartier (1491-1557), navegante bretón descubridor do Canadá para Francia; Jacques Bossuet (1627-1704), teólogo e escritor francés; James Cook (1728-1779), navegante inglés; Giacomo Puccini (1858-1924), compositor italiano; James Joyce (1882-1941), escritor irlandés en lingua inglesa.

Xaime Seixas (1915-1994), o Padre Seixas, natural de Santiago, sacerdote que oficiou a primeira misa en galego en Galicia desde a guerra civil, o 25 de xullo de 1965, e pioneiro na recuperación da onomástica galega coa súa obra 400 nomes galegos pra homes e mulleres (1977).

Xaime Quessada (1937-2007), pintor e gravador ourensán.

Xaime Illa Couto (1915-2012), avogado, economista e político galego, cofundador da editorial Galaxia (1950) e de SEPT, editorial católica galeguista; membro da RAG desde 1999.