Guía de nomes galegos

Do grego Teódōros, a través do latín Theodorus, de theós 'deus' e dôron 'don': 'don de deus', concepto igual ao expresado en Doroteo, só que coa orde inversa. Era un nome frecuente entre os gregos, que, sendo politeístas, podían especificar de que deus era agasallo o fillo: Apolodoro (de Apolo), Artemidoro (de Artemisa), Isidoro (de Isis). Naturalmente entre cristiáns monoteístas só perdurou Teodoro.

San Teodoro forma con santo Atanasio a parella de discípulos de Santiago que, segundo a tradición xacobea, trouxo o seu corpo desde Palestina, e que está enterrada co Apóstolo na catedral compostelá. Outro santo con este nome, do século III, era militar en Asia Menor; foi martirizado en tempos do emperador Maximino.

A emperatriz Teodora (século VI) foi esposa de Xustiniano, emperador de Oriente, que casara con ela malia ser de clase social inferior (era actriz).

Deste nome deriva a dinastía británica dos Tudor, de orixe galesa (Tewdwr ou Tewdor, en galés), que gobernou en Inglaterra de 1485 a 1603.

O escritor ruso Feodor Dostoievski (1821-1888), o presidente dos Estados Unidos Theodore Roosevelt Jr. (de 1901 a 1909) e o irmán do pintor Vincent van Gogh, o marchante de arte Théodorus ‘Théo’ van Gogh (1857-1891).

En Galicia lembramos o poeta en galego Teodoro Morgade Varela (Baio 1915 - A Coruña 1935).