Guía de nomes galegos

Do grego do Novo Testamento Simon, a través do latín eclesiástico Simon, primeiro nome do apóstolo san Pedro. No Evanxeo hai outro Simón Cananeo que predicou en Exipto. É unha variante do hebreo bíblico Xime'ôn, que dará como resultado Simeón.

Simón era o nome que tiña o apóstolo san Pedro antes de que Cristo llo cambiase, pero tamén o tiña outro dos doce discípulos de Xesús: o chamado Simón o Cananeo ou o Celote (por pertencer a este grupo independentista xudeu, conspirador contra o invasor romano).

San Simón ou Simeón o Estilita o Vello (século V) foi un asceta sirio do que se conta que, para facer aínda máis penitencia e mortificación, decidiu pasar o resto da súa vida na parte superior dunha columna (de aí o sobrenome de “estilita”, do grego stylos ‘columna’), na cal non se podía sentar nin deitarse; ao parecer así pasou 37 anos.

San Simón de Ons de Cacheiras (Teo), segundo a lenda, era un santo exclusivo da comarca compostelá, frade no mosteiro de San Martiño Pinario.

Na literatura quedou inmortalizada a Illa de san Simón, na ría de Vigo, grazas ao universal poema de Mendiño, en que, tal como chegou a nós, recibe o nome de San Simión, o que parece un estadio intermedio entre Simeón e Simón.

Simón Rodríguez (1679-1751), un dos grandes arquitectos galegos do estilo barroco. Simón Bolívar (1783-1830) o Libertador, militar e político venezolano que conseguiu independizar de España boa parte das colonias de Suramérica. O xudeu de orixe polaca Shimon Peres (1923-2016) foi Primeiro Ministro de Israel en dúas ocasións, nos anos oitenta e noventa do século XX.

Na forma feminina, as francesas Simone Weil (1909-1943), filósofa, e Simone de Beauvoir (1908-1986), escritora.