Guía de nomes galegos

Do latín pius 'cumpridor do seu deber cos parentes e cos deuses', 'piadoso'.

Levaron este nome doce papas, dos que salientamos os seguintes: Pío II (1458-1464), notable humanista; san Pío V (1566-1572), que puxo en marcha a Contrarreforma aplicando as normas do Concilio de Trento; Pío VII (1800-1823), que oficiou en 1804 en París a autocoroación de Napoleón; Pío IX (1846-1878), que se opuxo ao movemento a favor da unidade italiana e ao liberalismo; san Pío X (1903-1914), que condenou as novas doutrinas do seu tempo (como o modernismo); e Pío XII (1939-1958), que tivo máis sombras que luces á hora de se enfrontar ao fascismo e ao nazismo do seu tempo.

Pío Rodríguez Terrazo (1800-1872), natural de Leiro, provincialista galego que participou na chamada Revolución Galega de 1846, durante a que foi presidente da Xunta Superior do Goberno de Galicia.

Pío Baroja (1872-1956), natural de San Sebastián, foi un escritor español pertencente á xeración do 98. Aínda que foi alcumado “Impío Baroja” polo seu anticlericalismo, o seu pensamento político foi bastante controvertido.

Pia Arke (1958-2007), artista visual e de performance, escritora e fotógrafa danesa de Kalaaleq (inuit groenlandés). Olimpia Ana Pía Sebastiani (1925-2015), pianista e compositora arxentina. Pia Maria Nalli (1886-1964), matemática italiana.