Na historia da antiga Roma, Cneo Pompeio (c. 106-48 a. C.) formara triunvirato con Xulio César e con Craso. Erixido en xefe do partido aristocrático, estivo en guerra con César, que o derrotou en Farsalia. Fuxiu a Exipto, e alí mandouno asasinar o rei Ptolomeu.
Houbo un san Pompeio (século IV), bispo de Pavía (Italia) e unha santa Pompeia que foi mártir en Lión.
A cidade romana de Pompeia foi sepultada por unha erupción do Vesubio no ano 79 xunto coa de Herculano. A súa descuberta a mediados do século XVIII e as posteriores escavacións contribuíron a popularizar o nome.
