Guía de nomes galegos

Do latín olivarius 'oliveira'.

O nome tivo difusión na Idade Media grazas a Oliveiros (Olivier), un dos cabaleiros de Carlomagno, que personifica na Canción de Rolán a razón e a moderación, en contraposición coa fogosa valentía do seu amigo e compañeiro Rolán. É un nome simbólico, xa que a oliveira é o símbolo da paz.

En Galicia tivo vixencia este nome, como outros do ciclo artúrico, ata finais do século XV, polo menos entre membros da nobreza. Despois foi esmorecendo debido a disposicións eclesiásticas, como a do sínodo de Ourense de 1544, en que se lles recomendaba aos cregos oficiantes de bautismos que puxesen nomes de santos e santas —pois así os bautizados tiñan avogados no ceo— e que rexeitasen outros como Heitor ou Rolán “que habeis acostumbrado a le poner”.

Oliver Twist é o neno protagonista da novela As aventuras de Oliver Twist (1838) de Charles Dickens.

Oliver Cromwell, cabeza da revolución burguesa de Inglaterra no século XVII, que levou ao patíbulo ao rei Carlos I. Inspirou o drama Cromwell (1827), de Víctor Hugo.

Oliverio Girondo (1891-1967), poeta arxentino. Tamén o actor estadounidense do cinema mudo Oliver Hardy (1892-1957).