Guía de nomes galegos

Nome ruso de orixe escandinava, posiblemente do antigo noruegués Helga, feminino de Oleg. Parece derivar dunha abreviación de nomes que teñen por primeiro elemento heil 'saúde', que orixinariamente significou 'invulnerable'. Despois da cristianización dos xermanos adquiriu o significado de 'santo' e unha meirande difusión.

Santa Olga de Rusia (890-969) foi a primeira princesa rusa que se converteu ao cristianismo. É unha das poucas santas da Igrexa ortodoxa rusa. O seu marido Ígor, gran duque de Kíiv (Ucraína), fora asasinado en 945 polos drevlianos, pobo eslavo oriental; en canto asumiu ela a rexencia durante a infancia do seu fillo, planificou unha vinganza terrible que a levou a exterminar en masa multitude de xente deste pobo con métodos de extrema crueldade. Xa septuaxenaria, foi a Constantinopla para converterse ao cristianismo ortodoxo e tomou o nome de Helena. O nome Olga espallouse modernamente a través de personaxes de novelas rusas.

A ourensá Olga Gallego Domínguez (1923-2010), arquiveira e historiadora, foi a segunda muller elixida académica numeraria da RAG e a primeira en ocupar o seu asento na sede académica, pois a anterior —Francisca Herrera— faleceu antes de ler o seu discurso de ingreso.

Olga Evertovna Knorring (1887-1978), botánica rusa coñecida polos seus estudos das plantas de Asia Central.