Guía de nomes galegos

Posiblemente derivado do substantivo grego óphelos 'axuda, auxilio'. Outros sosteñen que procede do grego óphis 'serpe'.

A súa popularidade procede do personaxe feminino da traxedia Hamlet de W. Shakespeare. Ofelia é unha moza da nobreza dinamarquesa namorada do príncipe Hamlet. Acaba traxicamente afogada nun regato en que caera. A beleza de Ofelia inspirou a moitos pintores, particularmente dous prerrafaelitas ingleses do século XIX, fascinados pola fermosura e polo destino tráxico da personaxe shakespeariana: en 1852, Arthur Hughes e John Everett Millais presentaron na mesma exposición cadansúa Ophelia. Esta e outras pinturas influirían en posteriores representacións do Hamlet.

A galega María Ofelia Erenia Nieto Iglesias (1898-1931), máis coñecida como Ofelia Nieto, soprano de proxección internacional. Aínda que nacera en Algete (Madrid), como a súa irmá, a tamén soprano Ángeles Otein —Nieto ao revés—, sempre se considerou galega, pois o seu pai era de Santiago. Debutou en Madrid en 1914 na estrea da ópera Maruxa, de temática galega, de Amadeo Vives. Actuou en coñecidos teatros europeos, como La Scala de Milán, e participou en xiras por toda América cos mellores cantantes do momento. En 1922 foi homenaxeada no Centro Galego de Buenos Aires, onde agasallou os asistentes coa Cantiga e Un adiós a Mariquiña de Curros e Chané, cancións que logo gravaría en disco. Tanto Santiago de Compostela como Algete teñen unha rúa co seu nome.