Guía de nomes galegos

Do latín Octavius, derivado de octavus 'oitavo', que, orixinariamente, se lle impoñía ao oitavo fillo. Pertence, pois, á serie de nomes tirados de numerais ordinais como Primus, Secundus, Quintus, Sextus etc. Despois converteuse en nome persoal independentemente da orde de nacemento.

Este antropónimo adquiriu popularidade por ser o nome do primeiro emperador de Roma, coñecido por Octavio Augusto. A súa forma feminina levárona varias damas da nobreza romana da época imperial, entre elas unha irmá de Augusto, aínda que a máis célebre foi a filla de Claudio e Mesalina, muller do emperador Nerón (42-62), repudiada e desterrada por este.

Santo Octavio (século III) foi un membro da Lexión Tebana que sufriu martirio en Turín, segundo a tradición.

O escritor mexicano Octavio Paz (1914-1998), Premio Nobel de Literatura en 1990.

Octavio Lois Amado (1857-1888), científico galego.

Octavia E. Butler (1947-2006), escritora afroamericana consagrada polos seus libros de ficción científica feminista e por inserir a cuestión do prexuízo e do racismo nas súas historias.