Guía de nomes galegos

Do grego Olýmpios 'do Olimpo', monte entre Macedonia e Tesalia no cal estaba a residencia dos deuses, segundo a mitoloxía grega. Olympía é o topónimo que denomina a chaira da Élide na cal se celebraban os xogos olímpicos cada catro anos. A orixe última da palabra podería estar na raíz lamp 'brillar'.

A primeira Olimpia célebre na antigüidade foi a nai de Alexandre Magno, muller de Filipo de Macedonia (século IV a. C.).

Santa Olimpia (368-409), tras a súa viuvez fíxose diaconisa na Igrexa de Constantinopla. Santo Olimpio de Roma foi un mártir do século III.

Olimpia Valencia López (Baltar 1903 - Vigo 1987) foi a primeira muller galega licenciada en Medicina pola Universidade de Santiago; licenciouse en 1925 con Premio Extraordinario e especializouse en xinecoloxía. En 1931 encabezou un chamamento de apoio aos candidatos galeguistas da provincia de Pontevedra ao Congreso dos Deputados, e en 1936 outro a prol do “si” ao Estatuto Galego (os dous documentos estaban asinados exclusivamente por mulleres).

Olimpio Arca Caldas (Cuntis 1928 - A Estrada 2014) foi un activo mestre e escritor galeguista.

Olimpio Liste Regueiro (1932-2013), mestre e etnógrafo que en 1972 fundou en Oseira o primeiro museo etnográfico de Galicia; e, despois, en 1999, o que leva o seu nome en Vigo

Olympe de Gouges (1748-1793), pseudónimo de Marie Gouze, foi unha escritora e abolicionista francesa, e precursora do feminismo