Guía de nomes galegos

Procede do latín Lucianus, patronímico do nome propio Lucius, de étimo incerto. Despois pasaría a ser nome propio.

San Luciano de Antioquía (c. 235-312), primeiro tradutor da Biblia hebrea ao grego, foi o fundador da escola esexética de Antioquía, mestre de Ario e precursor do arianismo, ao defender a subordinación do Fillo e do Espírito Santo ao Pai, que cría superior. Foi martirizado.

San Luciano de Beauvais (Francia), do século III, chamábase Lucius, pero o seu pai modificoulle o nome; foi o primeiro bispo desta cidade, onde foi decapitado e, cefalóforo como san Denís, a lenda asegura que tras a súa execución colleu a cabeza nas mans e atravesou un río.

Santa Luciana foi unha  virxe de Bizancio, mártir durante o imperio de Diocleciano (304).

O tenor italiano Luciano Pavarotti (1935-2007). En Galicia, o médico e etnógrafo Luciano García Alén (1928-2015) e o farmacéutico e cineasta Luciano Piñeiro Martínez ‘Chano Piñeiro’ (1954-1995), director da primeira longametraxe en galego, Sempre Xonxa (1989).