Guía de nomes galegos

Do nome latino Lucius, moi popular entre os romanos, de étimo incerto, que por etimoloxía popular foi relacionado con lux, lucis ‘luz’, ou co verbo lucere ‘facer luz’, ‘alumear’. Adoitaba pórselle ós meniños que nacían ó mencer.

Na antiga Roma foi un nome moi corrente que levaron políticos como Lucio Cornelio Sila ou Lucio Serxio Catilina, ou escritores como Lucio Anneo Séneca e Lucio Apuleio.

San Lucio de Coira (capital do cantón dos Grisóns-Suíza), Luzius Curiensis, foi un lendario bispo e santo suízo que para uns viviu no século II e para outros entre o V e o VI. Segundo unha lenda chegou á Retia desde a súa Britania natal e sufriría martirio por volta do ano 200.

San Lucio de Cirene (séculos III-IV) era senador desta cidade do norte de África; converteuse ao cristianismo e retirouse á illa de Chipre, onde morreu martirizado.

Houbo tres papas con este nome: un do século III e os outros dous do XII.

Lucio Urtubia (1931-2020), albanel e militante anarquista coñecido pola súa práctica do anarquismo expropiador mediante a falsificación.