Guía de nomes galegos

Procede do nome latino Lucia, feminino de Lucius, nome de étimo incerto. O acento cambiou de Lucia a Lucí­a quizais por influencia da forma grega.

Santa Lucía de Siracusa (Sicilia), segundo a tradición, foi unha virxe martirizada durante a persecución de Diocleciano (303-304). É venerada por católicos, ortodoxos e luteranos. Represéntase na arte coa palma do martirio e con dous ollos sobre un prato ou bandexa (o seu atributo persoal); tense dito que fora porque llos arrincaran no martirio, pero isto non consta na súa historia lendaria, que conta que morreu decapitada ou ferida pola espada. O motivo iconográfico dos ollos no prato explícase pola asociación popular do seu nome coa palabra latina lux, lucis ‘luz’, interpretada como a súa posible orixe etimolóxica. Outra versión supón que o seu pai se chamaba Lucio e que lle puxo a ela a forma feminina do seu nome, como se acostumaba entre os romanos. No mundo cristián é avogada da vista.

Lucía Sánchez Saornil (1895-1970), poeta ultraísta española.

Lucia Berlin (1936-2004), escritora estadounidense.