Ecequías (século VIII a. C.) foi rei de Xudá nun momento en que este reino estaba sometido ao Imperio asirio. O seu pai, Acaz, aceptara o xugo imperialista, pero non así o seu fillo, que se atreveu a deixar de pagar tributos aos asirios, o que motivou que o emperador Senaquerib fose co seu exército contra os pobos palestinos rebeldes. En consecuencia, Ecequías non tivo máis remedio que seguir sendo vasalo do emperador. Non obstante, o Deuteronomio bíblico ten boa opinión deste rei, pola súa valentía e insubmisión.
