Ecequiel (séculos VII-VI a. C.) foi o terceiro dos grandes profetas de Israel. Deportado a Babilonia tras a conquista de Nabucodonosor, esperta a súa vocación profética naquela cidade. Primeiro converteuse na “sentinela de Israel”, anunciando castigos para o seu pobo. Despois, tras a nova conquista de Xerusalén por Nabucodonosor (588 a. C.) muda de postura e pasa a anunciar a salvación. Nace con el un novo xeito de vivir a fe, sen monarquía nin rei: do iavismo pasouse ao xudaísmo, do que se pode considerar pai a este profeta. Foi o símbolo nacionalista xudeu na diáspora babilónica. Tivo unhas estrañas visións, como a dun carro con rodas de lume no ceo; por esta razón hoxe os ufólogos téñeno por pioneiro.
