Guía de nomes galegos

Nome cristián feminino equivalente a Alba e Neves. Vén do xermánico *blank 'branco, claro, brillante' que veu substituír practicamente o albus latino como adxectivo na lingua común.

Branca de Castela (1188-1252) foi raíña consorte de Francia. Os reis de Inglaterra e de Francia chegaran a un acordo para que unha das tres infantas de Castela, fillas de Afonso VIII, casase co herdeiro do trono francés. Encargóuselle a Lionor de Aquitania, avoa das infantas, que fixese a escolla entre as netas. Lionor era xa unha anciá de 80 anos, pero iso non lle impediu desprazarse a cabalo desde Poitiers á corte castelá para cumprir a encomenda. Elixiu a Branca, que con 12 anos marchou para a corte francesa, onde casou co futuro Luís VIII (ano 1200). O matrimonio tivo varios fillos, entre eles o que chegaría a ser o rei Luís IX (san Luís). Cando morreu o seu marido foi raíña rexente de Francia.

Branca I de Navarra foi raíña deste reino de 1425 a 1441; con anterioridade fora raíña consorte de Sicilia (1401-1409).