Guía de nomes galegos

Nome de orixe eslava, de etimoloxía discutida. Hai quen ve nel unha contracción do antigo Bogoris, levado polo rei dos búlgaros no século X, hipocorístico do turco bogori ‘pequeno’. Tamén se ten considerado acortamento dun antigo nome persoal eslavo Boroslav, de bor ‘loita’ e slav ‘gloria’.

San Boris (séculos X-XI), príncipe de Kíiv (Ucraína), é o patrón da Igrexa rusa. No século X era un nome común de soberanos búlgaros, entre os que destaca Boris I, morto en 907, responsable da cristianización do seu país. Tamén foi nome de varios tsares rusos, como Boris Godunov, sucesor de Iván o Terrible.

O novelista ruso Boris Pasternak (1890-1960) foi o autor da novela Doutor Zhivago (1957), levada ao cinema en 1965. William H. Pratt (1887-1969), coñecido como Boris Karloff, foi un famoso actor británico do cinema de terror. Boris Vian (1920-1959) foi escritor e músico, autor de novelas como Cuspirei sobre as vosas tumbas ou A escuma dos días.