Guía de nomes galegos

Do latín Valentinus, derivado de Valens (Valente). Como nome persoal aparece só en época cristiá. Valentín é unha forma culta; o nome patrimonial consérvase no topónimo e antropónimo Ventín.

San Valentín foi un clérigo romano decapitado durante o goberno do emperador Claudio contra o ano 268. A súa basílica atópase na Via Flaminia de Roma e é moi visitada polos namorados, xa que é o seu patrón. Este costume, relativamente serodio en Galicia, onde entrou por vía comercial, pode ser debido tamén a que por volta da súa festa onomástica (14 de febreiro) polo norte de Europa empezan a emparellarse as aves. Hai tamén unha santa Valentina, virxe e mártir de Cesarea de Palestina no ano 308.

Utilizou este nome como pseudónimo Rodolfo Pietro Guglielmi (1895-1926), ‘Rodolfo Valentino’, actor estadounidense de orixe italiana, e, na forma feminina, a rusa Valentina V. Tereshkova (1939), a primeira muller astronauta da historia, que estivo no espazo do 16 ao 19 de xuño de 1963.

En Galicia, os xornalistas e escritores Valentín Lamas Carvajal (1849-1906) e Valentín Paz-Andrade (1899-1987), honrados coa Día das Letras Galegas dos anos 1972 e 2012, respectivamente; e o escritor e tradutor Valentín Arias López (1934-2011), pai da poeta Xela Arias.