Guía de nomes galegos

De orixe controvertida, tense posto en relación co latín sus ‘porco’ e co vasco otso. Pero a súa extraordinaria difusión na Alta Idade Media fai pensar nun antigo nome prerromano. É un dos nomes que perduraron nos séculos escuros da onomástica reducidos a apelidos, como Bernal, Duarte, Guillén, Lois, Oxea, Xiao e outros. Sueiro aparece como apelido en 2169 casos. Con este nome está emparentado o apelido Suárez.

Sueiro foi un nome moi común na Galicia medieval, especialmente entre a nobreza: abonde con amentar a Sueiro Gómez de Soutomaior, fillo de Paio, que testou en Vilanova en 1485 e que está enterrado en San Domingos de Pontevedra, onde se conserva a súa tumba pétrea cuberta coa súa escultura xacente.

Don Suero de Quiñones (século XV) foi un cabaleiro leonés que se fixo famoso por manter en 1434 un desafío nunha ponte do río Órbigo (o “Paso honroso”) contra calquera outro cabaleiro que se atrevese a cruzalo. O episodio satirizouno Cervantes no Quixote.